Job 17

1Imwin ei mour kerendohr, I solahr kak esingek;
solahr ahi mehkot me luhwe, ihte nan sousou.
2I kin kilang duwen aramas koaros ar kin kapailokei ie.
3Maing Koht, I kin mehlel. Komwi ketin kupwurehla ei pato.
Sohte emen me utung dahme I patohwan.
4Komwi ketin karotongelahr arail lamalam akan pwe re en dehr rong mehkan me mie katepe;
komwi dehr ketin mweidohng re en pereperenki ar poweiehdi.
5Nan lepin padahk en mahs ako aramas emen pangalahr kompoakepah kan pwehn ale pweipweiki,
oh nah seri kan ahpw alehki lokolok.
6Oh met aramas akan kin doadoahngki lepin padahk pwukat pwe re en uhkihong ie;
re kin kohdo oh kandipih meseiet.
7I kereniongehr maskunkihla ei nsensuwed;
pehi oh nehi kat ahtikitiklahr rasehng mwetehn paliweren aramas.
8Irail kan me kasik me irail me pwung pwuriamweikihla,
oh irail koaros kadeikiehda me dene sohte ei Koht.
9Irail kan me kasik me dene re me wahu
kin kamehlele me irail me pwung.
10Ahpw ma irail koaros kohdo oh uh mwohi,
sohte emen rehrail me I pahn diar me loalokong.
11Ei rahn akan imwiseklahr; ei koasoandi kan ohlahr;
ei koapworopwor sohralahr.
12Ahpw kompoakepahi kan kin nda me nipwong iei nin rahn;
re kin nda me marain kerendohr,
ahpw I ese me I mihmihte nan rotorot.
13Ihte ei koapworopwor sapwen me melahr akan,
wasa me I pahn wendi meirla nan rotorot.
14I pahn wiahkihla semei ei sousou,
oh mwahs akan me pahn kangiehla
I pahn wiahkihla inei oh riei serepein.
15Mie ehu koapworopwor ong ie?
Ihs me kilangadahr ehu?
16Sohte koapworopwor pahn iang ie
ni ei pahn kohdilahng nan sapwen me melahr akan.
Copyright information for PON2006A